ഞായറാഴ്ച

നമ്മളെപ്പോലെ തന്നെ
ഞായറിനും അറിയാം
ഇന്നൊരു
അവധിദിവസമാണെന്ന കാര്യം.
നോക്കൂ,
പത്തുമണി കഴിഞ്ഞിട്ടും
സൂര്യനെ ഭൂമിയിലേക്ക്
ഗേറ്റു കടത്തി വിടാതെ
മഴ വര്‍ഷിപ്പിയ്ക്കുന്നത്.
അയയിലെ തുണികള്‍
ഈര്‍പ്പം കളയാതെ
സൂക്ഷിക്കുന്നത്.
പത്രക്കാരന്‍ പയ്യനെ
പാതിവഴിയില്‍ വെച്ച്
കള്ളക്കുഴിയില്‍ വീഴ്ത്തുന്നത്.
എന്തിന്-
നിങ്ങളെ
തൊടുകപോലും ചെയ്യാ‍തെ
വീണ്ടും വീണ്ടും
ഉറക്കിയിടുന്നത്.

കാത്തിരിക്കുന്നവര്‍

പ്രണയിക്കാനായി
ബസ് സ്റ്റോപ്പിലേക്ക്
വേഗത്തില്‍ പോകുന്ന
യുവാക്കളോട്
ഈ കുന്നിന്റെ കഥ
പറഞ്ഞാല്‍ കേള്‍ക്കുമോ?

ബസ്സ് കിട്ടാതെ
അവര്‍ മണിക്കൂറുകളോളം
ഇരിക്കുമ്പോഴും
നൂറ്റാണ്ടുകളായുള്ള
ഈ കുന്നിരിപ്പു കാണുമോ?

അവര്‍ക്ക്
എന്തെങ്കിലും
തടയുമോ?